ឆ្នេរសមុទ្ររបស់វៀតណាមមានចំណុចទាក់ទាញដ៏អស្ចារ្យជាច្រើន — រលកទឹកក្តៅឧណ្ហៗ ដូងត្រជាក់ៗ គ្រឿងសមុទ្រស្រស់ៗ — ប៉ុន្តែសព្វថ្ងៃនេះមានហេតុផលមួយទៀតក្នុងការរៀបចំផែនការសម្រាប់ការដើរកម្សាន្តនៅតាមកោះ។ ហាងបារមាត់ឆ្នេរដ៏ស្រស់ស្អាតថ្មីៗជាច្រើនកំពុងតែធ្វើឱ្យតំបន់ឆ្នេររបស់វៀតណាម (និងអ្នកលេង Instagram) មានការភ្ញាក់ផ្អើល និងចាប់អារម្មណ៍យ៉ាងខ្លាំង។ សូមអានបន្តដើម្បីស្វែងយល់ពីហាងបារមាត់ឆ្នេរដែលយើងចូលចិត្តជាងគេនៅទូទាំងប្រទេស ហើយត្រៀមខ្លួននិយាយពាក្យ «ជល់កែវ» សម្រាប់ការមកលេងលើកក្រោយរបស់អ្នក។

---

Rock Island Club, Phu Quoc

មានចំណុចជាច្រើនដែលត្រូវស្រឡាញ់ចំពោះបារមាត់ឆ្នេរដ៏ប្លែកគេនេះ ដែលមានទីតាំងនៅលើកោះតូចមួយក្បែរឧបទ្វីប Mong Tay ក្នុង Phu Quoc។ អ្នកត្រូវធ្វើដំណើរតាមទូករយៈពេលពីរនាទីដើម្បីទៅដល់ផែនៅលើកោះ Rock Island។ ពីទីនោះ អ្នកអាចជ្រើសរើសរវាងកន្លែងអង្គុយលម្ហែកាយមាត់ទឹកដែលមានទេសភាពបែប panoramic កន្លែងអង្គុយលើផ្ទាំងថ្ម ឬពូកខ្នើយ (bean bags) នៅក្នុងបារដែលបើកចំហរ។ មិនថាអ្នកទៅទីណាក៏ដោយ អ្នកនឹងត្រូវបានអមដោយទេសភាពនៃរលកបោកបក់តិចៗនៃកោះ Phu Quoc ទូកនេសាទដែលកំពុងបើកបរ និង (នៅពេលដ៏សមស្រប) មេឃពណ៌ស្រស់ឆើតឆាយដូចត្បូង។ ក្រុម DJ ចាប់ផ្តើមចាក់ភ្លេងបែប funk និង tropical house ចាប់ពីពេលរសៀលជ្រេ ហើយនៅពេលដែលព្រះអាទិត្យលិចចូលទៅក្នុងមហាសមុទ្រ ហាងបារនៅលើកោះនេះនឹងភ្លឺចែងចាំងដោយពន្លឺដ៏ស្រស់ស្អាតប្លែកភ្នែក។ 

---

Sailing Club, Nha Trang

ក្នុងនាមជាបារដែលបានចាប់ផ្តើមអ្វីៗទាំងអស់នេះ ក្រុមការងារនៅពីក្រោយ Sailing Club មានបទពិសោធន៍ជាង ២៥ ឆ្នាំក្នុងការរៀបចំកម្មវិធីជប់លៀងមាត់ឆ្នេរដ៏ធំបំផុតរបស់វៀតណាមនៅកណ្តាលក្រុង Nha Trang។ ទោះបីជាមានអាយុកាលយូរឆ្នាំក៏ដោយ ក៏ Sailing Club នៅតែរក្សាកេរ្តិ៍ឈ្មោះដ៏ល្បីល្បាញរបស់ខ្លួនជាមួយនឹងបញ្ជីមុខម្ហូប និងភេសជ្ជៈអន្តរជាតិដ៏ឈ្ងុយឆ្ងាញ់ ក៏ដូចជាការចាក់ភ្លេងផ្ទាល់ពី DJ និងតន្ត្រីដ៏ល្អបំផុតមួយចំនួននៅវៀតណាមរៀងរាល់រាត្រី។ ហាងបារសរុបចំនួនបួន (សាករាប់មើលទៅ) បើកបម្រើជារៀងរាល់ថ្ងៃសម្រាប់ភ្ញៀវទាំងឡាយចាប់ពីម៉ោង ៨:៣០ យប់ ហើយនៅថ្ងៃសៅរ៍ ក្រុមការងារ Sailing Club រៀបចំកម្មវិធីជប់លៀងមាត់ឆ្នេរដ៏ធំអស្ចារ្យមួយដែលមានទាំងឆាកតន្ត្រី និងកម្រាលរាំនៅលើខ្សាច់ផ្ទាល់តែម្តង។ 

 

---

INK 360, Phu Quoc

ជិះជណ្តើរយន្តឡើងទៅជាន់ទី ១៩ នៅ Intercontinental Phu Quoc ហើយអ្នកនឹងទៅដល់ INK 360 ដែលជាបារលើដំបូលដ៏ស្រស់ស្អាតចម្លែកភ្នែករចនាឡើងដោយ Ashley Sutton និងជាបារដែលខ្ពស់ជាងគេនៅលើកោះនេះ។ នៅទីនេះ រូបមឹកយក្សដែលព្យួរជាប់ពិដានលាតសន្ធឹងពាសពេញ កម្រាលការ៉ូដែលមានក្រឡាដូចក្តារអុកមើលទៅហាក់ដូចជាដកស្រង់ចេញពីរឿង Alice in Wonderland ហើយអ្នកក្រឡុកស្រាទាំងអស់សុទ្ធតែស្លៀកពាក់អាវស៊កពណ៌ប្រផេះធ្យូងយ៉ាងស្អាត។ បរិយាកាសបែបសិល្បៈ avant-garde នៅក្នុង INK 360 នឹងរលាយបាត់ភ្លាមៗនៅពេលអ្នកឈានជើងចេញទៅខាងក្រៅ។ នៅលើរានហាលដ៏ធំទូលាយ ១៨០ ដឺក្រេ ភ្ញៀវទាំងឡាយនាំគ្នារង់ចាំទស្សនាថ្ងៃលិច ទាំងក្រេបស្រាក្រឡុកប្រចាំហាង និងស្រូបយកខ្យល់អាកាសដ៏ត្រជាក់ស្រេបពីសមុទ្រ Phu Quoc។

គន្លឹះ៖ ភេសជ្ជៈដែលគួរតែសាកល្បងគឺ Coral Muse, Three-way Mirror និង Top Deck ជាមួយស្រាប៊ឺបោន (bourbon)។

---

Skylight, Nha Trang

គ្រប់កម្មវិធីជប់លៀងទាំងអស់នឹងកាន់តែពិសេសជាមួយនឹងទេសភាពដ៏ស្រស់ស្អាត ហើយគ្មាននរណាម្នាក់ដឹងច្បាស់ពីចំណុចនេះជាងក្រុមការងារនៅពីក្រោយ Skylight Nha Trang នោះឡើយ។ "ក្លឹបឆ្នេរលើដំបូល" ដ៏ខ្ពស់បំផុតនៅក្នុងទីក្រុងនេះ ពិតជាមានទេសភាពដ៏អស្ចារ្យនៃឆ្នេរសមុទ្រកោង ភ្នំ និងទីក្រុង។ ប៉ុន្តែអ្វីដែលធ្វើឱ្យ Skylight មានភាពលេចធ្លោខ្លាំងនោះ គឺការកម្សាន្តដ៏សម្បូរបែបប្រកបដោយភាពច្នៃប្រឌិត។ គ្មានការសន្ទនាដ៏គួរឱ្យធុញទ្រាន់ឡើយនៅទីនេះ Skylight នាំភ្ញៀវទាំងឡាយទៅថតរូបដ៏ស្រស់ស្អាតនៅពេលថ្ងៃលិច (#skylightselfie) បន្ទាប់មកបំពេញចិត្តពួកគេជាមួយនឹងអាហារសម្រន់បែបអាស៊ីចម្រុះ (Asian fusion) សម្រាប់អាហារពេលល្ងច មុនពេលបង្កើនភាពសប្បាយរីករាយនៃកម្មវិធីជប់លៀងជាមួយនឹងចង្វាក់ភ្លេងដ៏រស់រវើក និងការបាញ់សាំប៉ាញបន្ទាប់ពីមេឃងងឹត។ បន្ថែមជាមួយការរាំលេងរបស់ពួក minions អ្នកលេងសៀក និងអ្នកដើរលើឈើចន្ទល់ផងនោះ វានឹងក្លាយជារាត្រីមួយដែលអ្នកមិនងាយបំភ្លេចបានឡើយ។ 

---

Sailing Club, Phu Quoc

នៅពេលរសៀល ព្រះអាទិត្យពណ៌មាសជះពន្លឺទៅលើតុ កៅអីសម្រាក និងអាងហែលទឹកគ្មានដែនកំណត់នៅ Sailing Club Phu Quoc។ ក្លឹបមាត់ឆ្នេរលំដាប់ខ្ពស់ដ៏ប្រណីតនេះ គឺជាកន្លែងទាន់សម័យបំផុតនៅលើកោះសម្រាប់សម្រាកលំហែកាយ ទទួលទានអាហារ និងជប់លៀងពេញមួយថ្ងៃ ប៉ុន្តែនៅពេលថ្ងៃលិច ទីនេះប្រែជាមានបរិយាកាសប្លែក ខណៈពេលដែលគ្រប់គ្នាជួបជុំគ្នា (ត្រៀមម៉ាស៊ីនថតរូបរួចជាស្រេច) ដើម្បីគយគន់ទិដ្ឋភាពថ្ងៃលិចពណ៌ស្វាយក្រម៉ៅដ៏ល្បីល្បាញរបស់កោះនេះ។ នៅពេលដែលពន្លឺចុងក្រោយនៃព្រះអាទិត្យរលត់ទៅ ការជប់លៀងក៏ចាប់ផ្តើមឡើងវិញយ៉ាងសប្បាយរីករាយ ជាមួយនឹងការរាំរបាំភ្លើង ស្រាក្រឡុកដ៏មានរសជាតិ និងចានអាហារសម្រន់ដ៏គួរឱ្យចង់ញ៉ាំពីផ្ទះបាយលំដាប់កំពូល។ បន្ទាប់មក ដើរទៅកាន់ឆ្នេរ Long Beach ដើម្បីដើរកម្សាន្តក្រោមមេឃដែលពោរពេញទៅដោយផ្កាយ។

---

ចង់បានគំនិតធ្វើដំណើរនៅវៀតណាមបន្ថែមទៀតទេ? ចុះឈ្មោះសម្រាប់ព្រឹត្តិបត្រព័ត៌មានរបស់យើង ដើម្បីទទួលបានរឿងរ៉ាវល្អៗបំផុតនៅក្នុងប្រអប់សំបុត្ររបស់អ្នក។